〔中高程度〕【電影介紹】Netflix 新戲 - 千祈唔好愕高頭 (ngok6 gou1 tau4) /Don't look up
2021年尾睇咗齣新戲，千祈唔好愕高頭(Don't look up)，雖然唔係廣東話戲，但係都好值得睇，皆因呢齣戲以幽默手法咁講一啲你我而家面對嘅現實。
戲入面講珍妮花羅倫絲(Jennifer Lawrence) 做嘅天文學準博士生，發現咗一粒直徑成6至9公里大嘅彗星，即將喺6個月後撞落地球，破壞力係成萬嚿核彈，等於全地球發生一次12級地震，簡單嚟講人類實死冇生。里安納度(Leonardo) 作為教授，災難片咁英雄上身，即刻搵NASA同總統，希望佢哋會做嘢處理呢單災難，但劇情去到呢度開始「現形」，變成荒誕黑色喜劇。
簡單嚟講呢齣戲串緊呢啲人/事：
為咗利益不擇手段嘅政治家
想透過災難而發到豬頭炳咁嘅商人
豬兜咁蠢、俾人唆擺兩句就咩都信嘅嘅人民
食花生食上癮嘅觀眾
而家娛樂大過一切嘅現實
我就唔劇透喇，之前有人劇透之後俾人打，不過我就作咗一個小對話，融合咁少少香港文化去個電影劇情度。
A： 科學家話有隕石要撞落地球！ 死緊啦我哋！地球要瓜柴喇！
B： 你嚇鬼咩？仲有唔好死死聲咁難聽，都未知係堅料定流料，你唔好人講你就信啦，用下腦啦！政府都話冇咁嘅事！
A： 個科學家講到似層層㗎喎，我聽完嚇到鼻哥窿冇肉！乜你仲咁淡定㗎！
B：呃鬼食豆腐咩！都係陰謀論啫，真係有隕石政府冇理由唔做嘢嘅。
A： 你真係唔見棺材唔留眼淚。 你試吓唔好耷低個頭睇手機，愕高頭望吓啦，真係有隕石㗎。
B：唉，邊度有呀，你咁蠻塞嘅，我話之你啦，唔同你講喇，我陣間仲要去睇Mirror演唱會。
A： 你係咪眼大睇過龍呀，咁大粒你都當透明？
B： 流星啫，弊，我夠鐘走喇，快啲喳喳林去食飯啦我哋。
A： 好呃，你想食咩呀？
-END-
**想要翻譯同錄音，可以每月訂閱文章！
即刻去查詢訂閱價錢：
https://www.cantonbaby.com/plans-pricing
贊助小妹
Reference 參考資料
香港人在疫情下的don't look up 最適合現今香港的電影https://www.youtube.com/watch?v=o-b_du7E2no
https://www.hk01.com/電影/717535/千萬別抬頭-影評-劇情荒謬卻真實-里安納度收起狂放演出身價